Deikundea, El Grecok asko maite zuen gaia, Pradoko Museoan dagoen mihisearen bertsio txikia da. Bertsio handia Madrilgo María de Aragón Ikastetxeko Deikundearen Elizako erretaularako pintatu zuen, 1596an enkargatu baitzioten. El Grecok mihise txikiagoetan errepikatzen zituen arrakasta handiena zuten edo berari gehien gustatzen zitzaizkion lanak, eta halaxe dio Pachecok: "[...] 1611. urtean [...] bizitza osoan pintatu zituen lan guztien jatorrizkoak erakutsi zizkidan, [...] mihise txikiagoetan [...]." Thyssen-Bornemisza Museoak ere lan honen bertsio txiki bat dauka. Lanak ikonografia berritzailea dauka; bertan, Ama Birjina, harrituta goiaingerua heldu delako, zutik jarri eta goiaingeruarengana biratu da, aingeru musikarien talde eder batek goiko aldea betetzen duen bitartean eta kerubin mordo batek bidea irekitzen dien bitartean Espiritu Santuaren usoaren argi-izpiei, Deikundearen unea adieraziz. Trebezia izugarriz eta gama kromatiko bikainez pintatutako lan hau margolariaren azken urteetako obra esanguratsua da. Domenikos Theotokópoulos Candian jaio zen, Kreta uharteko hiriburuan, eta hantxe hasi zuen ikonoen margolari izateko prestakuntza. Venezian egin zuen lan, eta, gero, Erroman; han, Alejandro Farnesio kardinalaren babespean, "margolari bikaintzat" hartu zuten. El Escorialeko multzo apaingarri handiek erakarrita, Espainiara joan zen 1577an, eta Toledon jarri zen betiko bizitzen. Han, giro kultu eta finean bizi izan zen, eta hantxe egin zituen bere obrarik onenak. [A.S.L.]